সাব-অলটার্ন কবিতা
আবু মুসা চৌধুরী

হইলদা চড়ই আই বইস্সে
ভাদি গাছর আগাত্,
পরান বন্ধু পরবাসত
আঁই আছি আঁর জাগাত।

এই বরষাত ভাই-যাবগই
খাল-বিল-ডোবা পইর,
দুঃখর কথা কারে কইয়ুম্
মনে মনে কইর ।

(আঁর) দিন ন, হাডের রাইত ন পোয়ায়
বন্ধু তোঁয়ারে ছাড়া,
আঁর জীবন খান কে-নে অইলো
ফোয়ানা জমির নাড়া।
কাঁঠ্ঠল গাছত্ কাঁঠ্ঠল পাইক্কে
আম গাছত্ আম,
হোরা হোয়ালির চোখর পানির
দুই পয়সা নাই দাম।

চান্নি পইরগা রাইতত্ বন্ধু
গতর হাঁন্দে কিল্লাই,
কে-নে হইয়ম্ এই নিদানত
কী মধু আঁই-চাই ?

২.

‘বারির শোভা গাছ-গাছালি
ঘরর শোভা নারী’
আঁর পরানর বন্দু কিল্লাই
আঁরে গেলগুই ছারি।
তোঁয়ার কবরত জুনি পোকে
পইত্য রাইতে কাঁদে,
প-অলা মন কয় বন্দু আইবো
হয়েক মাদান-বাদে।
মরুভূমির বয়ার তোঁয়ারে
ডাইকতাম আদর গরি,
তুঁই আছিলা আলগা বাতাস
তুঁই আছিলা পরি।
বেবাম বারিষার কালে
সায়র তোঁয়ারঅ পাড়া,
আঁই নাদান ‘মজনু’ ত’-অ
ন-ডরাইতাম গাড়া।
তোঁয়ারঅ গাছর গোয়াছি হাইলাম
হাইলাম পোয়ানা আম,
ত-অ-ত অ-বইন, ন-পাইলামরে
মহব্বতর দাম।
তুঁই গেলা গই পচিম মিক্যা
আঁই রইলাম পুবে,
জীবন-রসর ভাঁজে ভাঁজে
চাঁদ-সুরযু ডুবে।
কিল্লাই বন্দু নামি গেলা
ন-ফিরিবার ঘাটে,
তোঁয়ার লাই আর খরান শীতত্
উয়াইস্যা দিন কাটে \

৩.

টেম্পুওয়ালা, আস্তে চালা
জোরে ন-যাইও,
বাঁধি দিলাম মিডা পান
নিরালাতে খাইও।

আউলা অইলে আতিককা তুঁই
গাঁতত্ পরিবা,
আঁত-ঠ্যাং-গিরা ভা-ই গেলে
হঅ-কী-গরিবা।
গার্মন্টস্র ওই জোয়ান বেডি
খাপ দি ন-চাইও \

তোঁয়ার টেম্পু এ্যারোপ্লেন
তোঁয়ার টেম্পু রকেট,
ট্রিপর পরে ট্রিপ মারিলে
ভরি যাইব পকেট।

সি-বিচ নিবার হতা দিলা
আঁরে কী পাইও !

৪.

হাইচ্ পিডা খাবাইয়ুম্ আঁই
তোঁয়ারে কইলজা ডুবাই,
ন-যাইও আঁর মিডা জামাই
আঁরে রাখি ডুবাই।

এনওসি ত আঁই গেইয়ে
আইস্সে তোঁয়ার ভিসা,
কইলজার ভিতর ডালি দিইয়ে
অইনত্ জ্বলা সিসা।

আধা পেডি খাইয়ুম আঁই
উয়াস থাইক্কুম নইলে,
মানি লইয়ম পাড়ার মাইনষে
ফইন্নি আঁরে হইলে।
তোঁয়ারে বুকত্ রাহিয়েরে
রাইতত্ সুখর ঘুম,
কী আঁর চাইউম দুয়া উগ্গা
চাই মিডা চুম।

গাছর তলাত্ থাইক্কুম আঁই
সোনা-জেওর ন-চাই,
ডুবাই শঅরত্ ন-যাও তুঁই
আঁর মাথা ছুই ক’ চাই \

৫.

কেনে যাইউম তোঁয়ারঅ বাসাত্
আঁরে বুঝাই ক-অ
বাস-ট্যাম্পু ন-চলের ত
রাস্তাত্ আ-ই চ-অ।

যাইবার ভাড়া একশ টেয়া
যোগাড় যদি গরি
আইবার ভাড়া কন্ডে পাইয়ুম
জ্বালা পরান ভরি।
তোঁয়ারে চনাবুট-পেঁয়াজু
কে-নে হাবাই ক-অ \

দুনিয়াত্ এক আজাব আইস্সে
কী বলে ভাই করোনা,
শান্তি আরার পথত-অ নাই
শান্তি এহন ঘর-ও-না।
ও বন্ধু তুঁই, ত-অ ন-কইও
‘আজিয়া তুঁই য-অ \’